स्मार्टच्वाईस टेक्नोलोजिज र खल्ती बीच स्मार्ट क्यूआर मार्फत भुक्तानी सेवा सञ्चालनको लागि सम्झौता

काठमाडौँ । नेपाल राष्ट्र बैंकबाट अनुमति प्राप्त भुक्तानी प्रणाली सञ्चालक संस्था स्मार्टच्वाईस टेक्नोलोजिज लिमिटेड (SCT) र भुक्तानी सेवा प्रदायक संस्था खल्ती प्रा. ली. (Khalti Digital Wallet) बीच ‘स्मार्ट क्यूआर’ मार्फत भुक्तानी सेवा सञ्चालनको लागि सम्झौता सम्पन्न भएको छ ।

यस सम्झौता पश्चात् खल्ती डिजिटल वालेट प्रयोगकर्ताले स्मार्ट क्यूआर मार्फत मर्चेन्टहरुलाई भुक्तानी गर्न मिल्नुका साथै विभिन्न व्यापार—व्यवसायमा संलग्न व्यवसायीहरूले क्यूआर मार्फत भुक्तानी लिनलाई स्मार्ट क्यूआरको सुविधा पनि लिन सक्ने कम्पनीले जनाएको छ । क्यूआर कोडका लागि प्रचलित अन्तर्राष्ट्रिय मापदण्ड इ.एम.भि. स्टान्डर्ड पालना गर्दै नेपाल क्यूआर स्टान्डर्ड अन्तर्गत जारी हुने स्मार्ट क्यूआर नेपालको पहिलो इन्टरअपरेवल क्यूआर कोड हो ।

खल्ती प्रा. ली. को कार्यालयमा आयोजित कार्यक्रममा SCT का तर्फबाट प्रमुख कार्यकारी अधिकृत मनोज घिमिरे र Khalti Digital Wallet  का तर्फबाट प्रमुख कार्यकारी अधिकृत विनय खड्काले सेवा सञ्चालन सम्झौतामा हस्ताक्षर गरे ।

स्मार्ट क्युआर मार्फत हुने कारोबार बापतको रकम मर्चेन्टको खातामा तत्कालै फर्स्योट हुने भएकाले यस सेवाको सुरुवात पश्चात् खल्ती डिजिटल वालेटका प्रयोगकर्ता लगायत मर्चेन्टहरुलाई कारोबार गर्न झनै सजिलो हुने विश्वास रहेको छ ।