काठमाडौं गुर्खाज १११ रनमा समेटियो, सोहिलले लिए ५ विकेट

काठमाडौं । सिद्धार्थ बैंक प्रिमियर लिग (एनपिएल) को दोस्रो खेलमा काठमाडौं गुर्खाजले चितवन राइनोजलाई ११२ रनको लक्ष्य दिएको छ ।

टस हारेर पहिले ब्याटिङ गरेको काठमाडौं गुर्खाजले निर्धारित २० ओभरमा ९ विकेट गुमाएर १११ रन बनायो ।

चितवन राइनोजका बलर सामु काठमाडौं गुर्खाजका ब्याटरहरु निरीह बने । खेलमा सम्हालिन नसक्दा काठमाडौं गुर्खाज १११ रनमा समेटिनु पुग्यो ।

चितवन राइनोजका लागि पाकिस्तानी बलर सोहिल तन्विर घातक बने । ४ ओभर बलिङ गरेका उनले सर्वाधिक ५ विकेट लिए ।

काठमाडौँ गुर्खाजका ओपनर स्टेफेन इस्कीनाजी २ रनमा आउट भए । अर्का ओपनर माइकल लेभिटले २५ रनको आक्रामक पारि खेले पनि धेरै समय क्रिजमा टिक्न सकेनन् ।

यस्तै सुमित महर्जनले सर्वाधिक २९ रन बनाए । जेरार्ड इरासमसले ४ रनको योगदान दिए । भीक सार्की १ रनमा आउट भए । शङ्कर रानाले १६ रन बनाउँदा राशिद खान ४ रनमा आउट भए ।

काठमाडौँ गोर्खाजका कप्तान करण केसी १ र साहब आलम १ रनमा आउट भए । डेनियल डथवेट १९ रनमा र दीपेश कँडेल १ रनमा नट आउट रहे ।

चितवन राइनोजका लागि पाकिस्तानी बलर सोहिल तन्विरले शानदार बलिङ गरे । उनले ४ ओभरमा ५ विकेट लिए ।

रिजन ढकाल, कुशल मल्ल, अमरसिंह रौटेला र लुक बेन्केनस्टाइनले समान १–१ विकेट लिए ।