एनपिएलमा कर्णाली याक्सको पहिलो जित

काठमाडौं । सिद्धार्थ बैंक नेपाल प्रिमियर लिग (एनपिएल)मा कर्णाली याक्सले पहिलो जित निकालेको छ ।

चितवन राइनोजलाई ६ विकेटले पराजित गर्दै कर्णालीले पहिलो जित निकालेको हो ।

चितवनले लिएको १३१ रनको लक्ष्य कर्णालीले १९.५ ओभरमा ४ विकेट गुमाएर पुरा गर्‍यो ।

कर्णालीको जितमा ओपनर शिखर धवनले सर्वाधिक ४५ रन बनाए । उनी ५ रनले अर्ध शतक बनाउन चुके ।

अर्का ओपनर देव खनालले २५ रन जोडे । चाडविक वाल्टनले ३० रनको योगदान दिए । अर्जुन घर्ती ११ रनमा रन आउट हुँदा जिशान मकसूद १२ रनमा नट आउट रहे ।

बलिङमा भने चितवनका कुशल मल्ल, जान निकोल लोफ्टी ईटन र रवि बोपाराले समान १–१ विकेट लिए ।

त्यसअघि टस हारेर पहिले ब्याटिङको निम्तो पाएको चितवनले निर्धारित २० ओभरमा सात विकेट गुमाउँदै एक सय ३० रन बनायो ।

चितवनका लागि रवि बोपारा अविजित रहँदै अर्धशतकीय पारी खेले । उनले ४० बलमा एक छक्का र सात चौकाको मद्दतले ५९ रन बनाए ।

कप्तान कुशल मल्लले २३, विपीन रावलले ११, जान निकोल लोफ्टी इटन र अमर रौतेलाले समान ९/९ र दीपक बोहोराले ८ रनको योगदान दिए ।

शरद भेषावकरले अविजित रहँदै ६ रन जोडे भने सोहेल तनवीर शून्य रनमा आउट हुन पुगे । चितवनले अतिरिक्त पाँच रन प्राप्त गर्‍यो ।

कर्णाली याक्सका लागि विपीन शर्माले सर्वाधिक तीन विकेट लिए । कर्णालीका जिशान मकसूदले दुई, नन्दन यादव र कप्तान सोमपाल कामीले एक/एक विकेट हात पारे ।

तीन खेलमा कर्णालीले पहिलो जित हात पार्दै अंकको खाता खोलेको छ । तेस्रो खेल खेलेको चितवनको भने यो पहिलो हार हो । यसअघि दुई खेल जितेको चितवनसँग ४ अंक रहेको छ ।