पोखरामाथि कर्णालीको ७ विकेटको शानदार जित
मकालु खबर
काठमाडौं । सिद्धार्थ बैंक नेपाल प्रिमियर लिग (एनपिएल)मा कर्णाली याक्सले पोखरा एभेन्जर्सलाई पराजित गरेको छ ।
आज भएको खेलमा कर्णालीले पोखरालाई ७ विकेट पराजित गरेको हो । जितका लागि पाएको १०४ रनको लक्ष्य कर्णालीले १५ औँ ओभरमा ३ विकेट गुमाएर पुरा गर्यो ।
कर्णालीको जितमा गुलशन कुमार झाले आक्रामक ब्याटिङ गरे । गुलशन ४९ रनमा नट आउट रहे । उनले ४ छक्का र ३ चौका प्रहार गरे ।
चाडविक वाल्टनले ४२ रनको योगदान दिए । उनले ६ चौका र १ छक्का हिर्काए । उनी कुलत भुर्तेलको बलमा बोल्ड आउट भए ।
ओपनर देव खनाल शून्य रनमा आउट भए भने बाबर हायात ७ रनमा बोल्ड भए । विलियम बोसिस्टो २ रनमा नट आउट रहे ।
बलिङमा भने पोखराका विपिन खत्री, सागर ढकाल र कुशल भुर्तेलले समान १–१ विकेट लिए ।
त्यसअघि टस जितेर पहिले ब्याटिङ गरेको पोखरा एभेन्जर्स १६.३ ओभरमा अल आउट हुँदै १०३ रनमा समेटियो । पोखरालाई सस्तैमा समेट्न विलियम बोसिस्टोले घातक बलिङ गरे ।
४ ओभर बलिङ गरेका बोसिस्टो एक्लैले ६ विकेट लिए । उनले २८ रन मात्रै खर्चिए । सोमपाल कामी, विपिन शर्मा र युनिष ठकुरीले समान १–१ विकेट लिए ।
टस जितेर पहिले ब्याटिङ रोजेको पोखराले सुखद सुरुवात गरे पनि लामो समय कुनै ब्याटर क्रिजमा टिक्न सकेनन् । ओपनर दिनेश खरेल र आन्द्रेस गौसले शानदार सुरुवात गरेका थिए । तर, दुवै ओपनर आउट भएपछि पोखराको ब्याटिङ धरमरायो ।
ओपनर दिनेश खरेलले २६ र आन्द्रेस गौसले २५ रन बनाएर आउट भए । दोस्रो नम्बरमा ब्याटिङ गर्न आएका कप्तान कुशल भुर्तेलको ब्याट आज पनि चलेन ।
भुर्तेलले १० रन मात्रै बनाउन सके । रेमन रेफरले २० र विपिन खत्रीले १० रन बनाउनु बाहेक अन्य ब्याटरले दोहोरो अङ्कमा रन बनाउन सकेनन् ।
म्याट क्रिचले शून्य रनमा आउट भए । दिलिप नाथले ३ रनको योगदान दिँदा माइकल लिस्कले २ रन मात्रै बनाउन सके ।
नारायण जोशी र आकाश चन्दले १–१ रन मात्रै जोड्न सके । सागर ढकाल शून्य रनमा नट आउट रहँदा विपिन खत्री १० रनमा रन आउट भए ।
मकालु खबर
