सेमिफाइनलमा बङ्गलादेशसँग हार्यो नेपाल
मकालु खबर
काठमाडौं । एसिसी यु– १९ महिला एसिया कप क्रिकेटअन्तर्गत सुपर चारको आफ्नो दोस्रो खेलमा नेपाल बङ्गलादेशसँग पराजित भएको छ ।
यससँगै नेपालको महिला एसिया कपको यात्रा सकिएको छ । नेपाल आज विजयी भएको भए फाइनलमा प्रवेश गर्थ्यौ । तर, बङ्गलादेशसँग ९ विकेटले पराजित भयो ।
जितका लागि ५५ रनको सामान्य लक्ष्य पाएको बङ्गलादेशले ९.५ ओभरमा १ विकेट गुमाएर पुरा गर्यो ।
बङ्गलादेशको जितमा फाहोमिदा चोयाले सर्वाधिक २६ रन बनाइन् । ईवाले १८ रन बनाइन् भने सुमैया अख्तर सुवर्णले १० रनको योगदान दिइन् ।
बलिङमा भने नेपालकी कुसुम गोदारले १ विकेट लिइन् । अन्य बलरले विकेट लिन सकेनन् ।
त्यसअघि टस हारेर पहिले ब्याटिङको निम्तो पाएको नेपालले निर्धारित ११ ओभरमा ८ विकेट गुमाउँदै ५४ रन जोड्यो ।
नेपालका लागि सावित्री धामीले सर्वाधिक ११ रन जोडिन् । कप्तान पूजा महतोले ९ रन बनाउँदा एलिशा कुमारी यादवले ८ रन थपिन् ।
साना प्रवीण र तिरसाना विश्वकर्माले समान ४–४ रन बनाइन् ।
सीमाना केसी र कुसुम गोदारले समान ३–३ रनको योगदान दिइन् । सोनी पाख्रिनले २ रन बनाउँदा ज्योत्स्निका मरासिनीले ५ रन बटुलिन् ।
बलिङमा भने बङ्गलादेशकी फरजाना इसमिन, अनीसा अख्तर सोबा, फाहोमिदा चोया र हबिबा इस्लामले समान १–१ विकेट लिइन् ।
मकालु खबर
