एमाले-काँग्रेस सांसदहरू सार्वजनिक लेखा समिति सभापतिको बचाउमा

काठमाडौँ । नेकपा एमालेका सांसद योगेश भट्टराईले लेखा समिति सभापति ऋषिकेश पोखरेलकी पत्नी अञ्जला कोईराला अदालतमा उपस्थित हुनुपर्ने बताएका छन् ।

सोमवार प्रतिनिधि सभा अन्तर्गतको सार्वजनिक लेखा समितिको बैठकमा बोल्ने क्रममा भट्टराईले आरोपित सभापति पत्नी कोइरालाले न्यायिक निरूपणलाई अदालतमा उपस्थित भएर सघाउनुपर्ने बताएका हुन् । उनले सभापतिबारे उठेका प्रश्नको जवाफ दिने ठाउँ समिति नभए पनि स्पष्ट बनाउँदा हुने बताए । उनले सभापतिको श्रीमती एउटा सहकारीमा जोडिए पनि न्याय निरूपणको लागि उनी अदालतमा जाने विश्वास रहेको उल्लेख गरे ।

उनले पछिल्लो समय मुद्दा लाग्दैमा कतिपयले बाहिर कराउँदै हिँड्ने गरेको भन्दै एमालेका नेता कार्यकर्ताले त्यस्तो नगर्ने विश्वास लिएको बताए । उनले सभापतिलाई समेत श्रीमतीसँग जोडेर गरिएका प्रश्नबारे प्रष्ट पार्न आग्रह गरे । उनले सार्वजनिक लेखा समिति सभापति जस्तो प्रतिष्ठित व्यक्तिले आफ्नो परिवारलाई लुकाएर राख्न नहुने भन्दै त्यो सम्भव पनि नभएको उल्लेख गरे ।

सचिव भट्टराईले हाल रहेको सत्ता गठबन्धन २०८४ सालसम्मै जाने दाबी गरे । उनले विगतमा रहेको राजनीतिक परिस्थितिअनुसार संसदको पदाधिकारीबारे सहमति भएको बताए । उनले राष्ट्रिय सभा अध्यक्ष, समिति सभापति सबैमा राजनीतिक परिस्थिति अनुसार चयन भएको उल्लेख गर्दैअहिलेको परिस्थिति अनुसार सबै बदल्ने हो भने आफूहरू तयार रहेको बताए ।

उनले भने ‘नेकपा एमाले र नेपाली काँग्रेस दुई पार्टी मिलेर बनेको सरकार भएकाले समितिमा बहुमत पुग्छ । समिति बैठकमा दुई पार्टीले बढी ध्यान केन्द्रित हुनुपर्ने देखिन्छ । सभापति ज्युको कुरा पनि उठेका छन् । आज पनि समितिमा मान्य ज्युले उठाउनुभएको छ । हामी सुशासनको प्रत्याभूति गर्ने र चेक एण्ड ब्यालेन्स समितिमा बसी रहेकाले आर्थिक लेनदेनको हिसाबले ठिक ठाउँमा उभिनुपर्छ । आफू ठिक ठाउँमा उभिन सकेनौँ भने अरूलाई डन्डा चलाउन सकिँदैन । सभापति प्रति प्रश्न उठेका छन् । सभापतिले स्पष्टीकरण दिनु पर्ने फोरम समिति होइन । केही छ भने सभापतिले स्पष्ट भन्नुस् । परिवारहरू विभिन्न ठाउँमा जोडिएका हुन्छन् । श्रीमती,छोराछोरी जोडिए भन्दैमा अर्कोलाई तान्न मिलेन । मैले बुझेअनुसार सभापति ज्युको श्रीमती ज्युको कुनै एउटा सहकारीमा नाम जोडिएको छ । विराटनगरको जिल्ला अदालतमा मुद्दा दायर भएका छन् । सभापति ज्यु जस्तो प्रतिष्ठित व्यक्तिले आफ्नो परिवारलाई लुकाएर राख्ने कुरा भएन । सम्भव छैन । गर्दा पनि गरिर्दैन । नेकपा एमालेको प्रतिनिधि र इमानदार सदस्य सभापति हुनुको नाताले उहाँले त्यो गर्नुहुन्छ भन्ने पनि लाग्दैन । सभापति ज्युको श्रीमती अदालतमा हाजिर हुन जानुहुन्छ । जानुपर्छ । अरु कराउने चिच्याउने गरे जस्तो एमालेका सदस्यले यस्तो गर्नु हुँदैन ।’

नेपाली काँग्रेसका सांसद नेपाली काँग्रेसका सांसद राजेन्द्र केसीले श्रीमतीले गल्ती गर्दा श्रीमान फस्ने हुन् कि भन्ने ठूलो चिन्ता रहेको बताए । उनले श्रीमतीले गल्ती गर्दा श्रीमान फस्ने हुन् कि हैन कानुनले के भन्छ भन्दै चिन्ता व्यक्त गरे । सांसद केसीले लेखा समिति सभापति ऋषिकेश पोखरेलको बचाउ समेत गरे । उनले सभापतिको श्रीमतीको पक्राउ जारी भएको तर सभापतिलाई नभएको भन्दै सभापतिलाई यसमा मुछ्नु राम्रो नभएको बताए ।

नेकपा एमालेका सांसद गोकुल बास्कोटाले समिति सभापतिप्रति व्यक्तिगत रुपमा आरोप÷प्रत्यारोप लगाउन नहुने बताए । उनले अदालतबाट आरोप पुष्टि नभई सभापति प्रति आरोप लगाएर प्रश्न उठाउनु जायज नभएको बताए ।

नेपाली काँग्रेसका प्रमुख सचेतक श्याम घिमिरेले विगतमा रहेको राजनीतिक परिस्थितिअनुसार संसदको पदाधिकारीबारे सहमति भएको बताए । उनले राजनीतिक सहमतिको आधारमा सभापति चयन भएकाले बारम्बार सभापतिप्रति प्रश्न उठाउनु जायज नभएको बताए ।

समिति सभापति ऋषिकेश पोखरेलले नीतिगत रूपमा आफूमाथि उठेका विषयमा विभिन्न ठाउँमा जवाफ दिन तयार रहेको बताए । उनले कानुनी प्रक्रियामा रहेका विषयको सबै परीक्षामा समावेश हुन आफू तयार रहेको उल्लेख गरे ।

उनले सभापति चयनका विषयमा दलहरूबिचको सहमति स्वीकार्य हुने बताए ।